Барысаў

У Барысаве пачнуць рабіць "цёплыя" панэлі

Як вядома, сыстэмы цэнтральнага абагрэву, якія дзейнічаюць у шматпавярховіках, у значна большай ступені награюць знадворнае паветра, чым, уласна, кватэры. Праз вокны і сьцены, вэнтыляцыйныя сыстэмы навонкі вырываецца прыкметная доля цяпла, прадвызначаная для абагрэву жыхароў.

Зрэшты, вокны можна заклеіць альбо нават памяняць на больш сучасныя, вэнтыляцыйныя адтуліны прычыніць, а вось із сьценамі нашмат складаней, асабліва ў панэльных дамах. Іх можна адно ўцяпліць адмысловай «шубай», але справа гэтая стратная, и самім жыхарам не пад сілу. Дый дзяржаве таксама. У Менскай вобласьці жыльлёва-камунальныя службы здолелі рашчодрыцца на «цеплавую рэабілітацыю» толькі трох шматкватэрных дамоў.

Магчыма, крыху больш пашчасьціць тым, хто будзе будаваць свае кватэры ў панэльных шматпавярховіках пасьля 2009 году.
На двух прадпрыемствах будаўнічай прамысловасьці вобласьці -- ААТ «Барысаўжылбуд» і ААТ «Салігорскі ДБК» -- адбываецца рэканструкцыя вытворчасьці з мэтаю выпуску новых энэргазахавальных панэляў для будаўніцтва шматкватэрных дамоў. Новыя тэхналёгіі на гэтых прадпрыемствах будуць уведзеныя ў эксплюатацыю ад 1 студзеня 2009  году.

Паводле Ёсіфа Дымковіца, Барысаў электронны